कपिलवस्तु -स्वतन्त्र उम्मेदवार चिन्ता परियारलाई “क्यामरा” चुनाव चिन्ह
कपिलवस्तु निर्वाचन क्षेत्र नम्बर ३ मा प्रतिनिधिसभा सदस्य पदका स्वतन्त्र उम्मेदवार तथा पत्रकार चिन्ता परियारले आगामी निर्वाचनका लागि “क्यामरा” चुनाव चिन्ह प्राप्त गरेका छन्। निर्वाचन आयोगले स्वतन्त्र उम्मेदवारहरूलाई चुनाव चिन्ह वितरण गर्ने क्रममा परियारलाई उक्त चिन्ह प्रदान गरेको हो।
लामो समयदेखि पत्रकारितामा सक्रिय रहँदै आएका परियारले यसपटक परम्परागत दलगत राजनीतिभन्दा फरक एजेण्डा अघि सार्दै स्वतन्त्र रूपमा उम्मेदवारी दिएका हुन्। उनले सुशासन, पारदर्शिता, जनउत्तरदायित्व र “Right to Recall” (जनप्रतिनिधि फिर्ता बोलाउने अधिकार) जस्ता विषयलाई मुख्य चुनावी मुद्दा बनाएका छन्।
परियारले “क्यामरा” चिन्हलाई सत्य, सूचना र जनआवाजको प्रतीकका रूपमा लिएको बताएका छन्। पत्रकारिताबाट समाजका आवाज उठाउँदै आएका कारण यो चिन्ह आफ्नो पहिचानसँग मिल्ने उनले उल्लेख गरेका छन्।
उनका अनुसार चुनावी अभियान घरदैलो कार्यक्रम, युवासँग अन्तरक्रिया र नागरिक केन्द्रित बहसमार्फत अगाडि बढाइनेछ। कपिलवस्तु–३ मा यसपटक स्वतन्त्र उम्मेदवारको सक्रियता बढ्दै गएकाले चुनावी प्रतिस्पर्धा थप रोचक बन्ने देखिएको छ।