कपिलवस्तु –स्वास्थ्य क्षेत्रमा पहुँच विस्तार गर्ने लक्ष्यसहित कपिलवस्तुको कृष्णनगर नगरपालिका र रूपन्देहीस्थित देवदह मेडिकल कलेज एण्ड रिसर्च इन्स्टिच्युटबीच ऐतिहासिक सहमति भएको छ । उक्त सहमति अनुसार नेपालकै पुराना अस्पतालहरूमध्ये एक मानिने बहादुरगञ्जस्थित शिवराज अस्पतालमा अब नियमित रूपमा विशेषज्ञ चिकित्सकद्वारा सेवा सञ्चालन गरिने भएको छ ।

शिवराज अस्पतालमा विशेषज्ञ सेवा विस्तार गर्ने उद्देश्यले आयोजित अन्तरक्रिया तथा सम्झौता आदानप्रदान कार्यक्रममा कृष्णनगर नगरपालिकाका नगरप्रमुख रजत प्रताप शाहले अब नगरवासीहरूले स्वास्थ्य सेवा पाउन अन्यत्र धाउनु नपर्ने विश्वास व्यक्त गर्नुभयो । उहाँले भन्नुभयो, “कृष्णनगर नगरपालिका स्वास्थ्य पहुँच र सेवा प्रवाहको मामिलामा अघि बढ्दैछ । अब हाम्रा नागरिकहरूले आफ्नै ठाउँमा विशेषज्ञ सेवा पाउनेछन् ।”

नगरप्रमुख शाहका अनुसार, नगर क्षेत्रका बासिन्दाहरू सामान्य रोगको उपचारका लागि समेत भारत तथा बुटवलजस्ता स्थानमा जानुपर्ने बाध्यता थियो ।

चिकित्सकको अभाव, उपकरणको कमी र पूर्वाधारको अभावले गर्दा शिवराज अस्पतालको सेवा प्रभावकारी हुन सकेको थिएन । यही समस्यालाई सम्बोधन गर्न कृष्णनगर नगरपालिकाले निजी क्षेत्रसँग सहकार्य गर्दै सार्वजनिक–निजी साझेदारी (PPP मोडेल) मार्फत स्वास्थ्य सेवामा सुधार ल्याउने रणनीति अघि सारेको हो ।

उक्त कार्यक्रममा देवदह मेडिकल कलेज रिसर्च सेन्टरका प्रमुख कार्यकारी अधिकृत (सीईओ) गोपालबहादुर भण्डारीले कपिलवस्तुमा आफ्ना सेवा विस्तार गर्न पाउनु गौरवको विषय भएको बताउनुभयो । “हामी नागरिकको स्वास्थ्यलाई ध्यानमा राखेर सेवा विस्तार गर्दैछौं,” उहाँले भन्नुभयो, “शिवराज अस्पतालजस्तो ऐतिहासिक संस्थासँग सहकार्य गरेर गुणस्तरीय सेवा दिन पाउँदा हामी खुसी छौं ।”

भण्डारीका अनुसार, प्रारम्भिक चरणमा आन्तरिक रोग, बालरोग, स्त्रीरोग र हाडजोर्नी लगायतका विशेषज्ञ सेवा सञ्चालन गरिनेछ । भविष्यमा आवश्यकता अनुसार सेवा विस्तार गर्दै जाने योजना रहेको उहाँले बताउनुभयो ।

यसका लागि आवश्यक मानव स्रोत, उपकरण र प्रविधि व्यवस्थापन कलेजले गर्नेछ भने पूर्वाधार व्यवस्थापनमा नगरपालिका सहयोग गर्नेछ ।

सम्झौता कार्यक्रममा नगरपालिकाकी उपप्रमुख आरतीदेवी चौधरी, प्रमुख प्रशासकीय अधिकृत खेमराज देवकोटा, नगरका वडाध्यक्षहरू, स्वास्थ्य शाखा प्रमुख, बहादुरगञ्जस्थित शिवराज अस्पतालका प्रतिनिधिहरू, देवदह मेडिकल कलेजका खडक जिरेल, समाजसेवी भारत किशोर चौधरी लगायतको उपस्थिति रहेको थियो । सहभागीहरूले यस्तो सहकार्यले स्थानीय तहमा जनस्वास्थ्यमा सकारात्मक प्रभाव पर्ने विश्वास व्यक्त गरेका छन् ।

कार्यक्रममा बोल्दै उपप्रमुख चौधरीले महिलाहरूका लागि सुरक्षित मातृ सेवा र बालस्वास्थ्य सेवा सञ्चालनमा समेत विशेष ध्यान दिन आग्रह गर्नुभयो । “महिला तथा बालबालिकाको स्वास्थ्य संवेदनशील विषय हो । विशेषज्ञ सेवा सञ्चालनसँगै यी क्षेत्रलाई प्राथमिकता दिनुपर्नेछ,” उहाँले भन्नुभयो ।

स्थानीय जनप्रतिनिधिहरूले पनि नगर क्षेत्रमै गुणस्तरीय सेवा पाउने भएपछि जनतामा स्वास्थ्यप्रति विश्वास बढ्ने र स्वास्थ्य सूचकहरूमा सुधार आउने आशा व्यक्त गरे ।

शिवराज अस्पतालका प्रतिनिधिहरूले अस्पतालको ऐतिहासिक गौरव पुनः स्थापित गर्न यस्तो सहकार्य प्रेरणादायी हुने बताउँदै जनताको अपेक्षा अनुसार सेवा दिन तयार रहेको बताए । अस्पताल व्यवस्थापन समितिले आवश्यक समन्वय र सहज वातावरण निर्माण गर्न प्रतिबद्धता जनाएको छ ।

कृष्णनगर नगरपालिकाले पछिल्लो समय स्वास्थ्य, शिक्षा र पूर्वाधार विकासमा सक्रियता बढाएको छ । यसअघि पनि नगरपालिकाले स्वास्थ्य बीमा कार्यक्रम, सुरक्षित मातृत्व सेवा र स्वास्थ्य चौकीहरूको स्तरोन्नति गर्न पहल गर्दै आएको छ ।

शिवराज अस्पतालमा विशेषज्ञ सेवा सञ्चालन भएपछि कपिलवस्तु जिल्लाको पश्चिमी क्षेत्रका हजारौं नागरिकले प्रत्यक्ष लाभ लिनेछन् । सीमावर्ती क्षेत्रका नागरिकहरू पनि अब सहज रूपमा उपचार सेवा पाउने भएका छन् ।